محادثات الذكاء الاصطناعي
إزاي بتتحسب محادثات الوكيل الذكي، وامتى بتتجدد، وإيه اللي بيحصل لما توصل للحد.
كل باقة فيها عدد معيّن من محادثات الذكاء الاصطناعي في الشهر. ده اللي بيحدد الوكيل الذكي يقدر يرد على كام عميل.
شوف استهلاك الشهر دهإيه هي المحادثة؟
محادثة = عميل واحد بيكلمك، والوكيل الذكي بيرد عليه، خلال 24 ساعة. مهما العميل بعت رسايل في الـ 24 ساعة دي، بتتحسب محادثة واحدة. لو رجع كلّمك بعد ما الـ 24 ساعة تعدّي، بتتحسب محادثة جديدة.
| الموقف | بيتحسب؟ |
|---|---|
| عميل جديد بعت على واتساب والوكيل رد عليه | محادثة واحدة |
| نفس العميل بعت 30 رسالة في نفس اليوم | لسه محادثة واحدة |
| نفس العميل رجع بعد يومين يسأل عن وحدة تانية | محادثة جديدة |
| فريقك رد بنفسه والوكيل متوقف في المحادثة | مش بيتحسب |
| الوكيل حوّل للفريق من غير ما يبعت أي رد | مش بيتحسب |
| الوكيل حصلت معاه مشكلة فنية ومبعتش رد | مش بيتحسب |
| «اقتراح رد بالذكاء الاصطناعي» و«تلخيص» في المحادثات | مش بيتحسبوا |
| تجربة الوكيل من لوحة التحكم | مش بتتحسب |
امتى بتتجدد؟
المحادثات بتتجدد أول كل شهر بتوقيت القاهرة، مهما كان معاد اشتراكك. اللي متستخدمش في الشهر مش بيترحّل للشهر اللي بعده.
تابع استهلاكك
في «الإعدادات ← الباقة والاشتراك» تحت «استهلاك الشهر ده» هتلاقي عداد «محادثات الذكاء الاصطناعي» قدام الحد بتاع باقتك (ومعاه أي محادثات زيادة طلبتها للشهر ده).
وكمان بيوصلك تنبيه (للمالك والمديرين):
- عند 80%: إشعار مرة واحدة في الشهر، وشريط فوق لوحة التحكم بالعدد اللي استخدمته.
- عند 100%: إشعار إن المحادثات خلصت، وشريط أحمر فوق لوحة التحكم.
لما توصل للحد
ولا رسالة بتضيع
لما المحادثات تخلص، الوكيل الذكي بيقف والمحادثات الجديدة بتروح لفريقك. العميل رسالته بتوصل عادي في «المحادثات»، والمحادثة بتظهر «محتاج موظف» وسبب التحويل «محادثات الذكاء الاصطناعي خلصت للشهر ده».
المحادثة اللي اتحسبت خلال آخر 24 ساعة قبل ما توصل للحد، الوكيل بيكمّل يرد فيها لحد ما الـ 24 ساعة بتاعتها تخلص.
عشان الوكيل يرجع يرد قبل أول الشهر، عندك اختيارين:
- اطلب «+100 محادثة ذكاء اصطناعي» من «الإضافات». الباقة دي للشهر الحالي بس. شوف الإضافات.
- رقّي لباقة أكبر من «الباقة والاشتراك». شوف الباقات.
الأرقام في التطبيق
عدد المحادثات في كل باقة مدفوعة مكتوب في «الإعدادات ← الباقة والاشتراك». التجربة المجانية فيها 50 محادثة.